கல்லறைப் பாடம் - 30

கல்லறைப் பாடம் - 30

தாராள குணத்தில் உத்தரிக்கும் ஆன்மாக்களை யாராலும் வெல்ல முடியாது

பாஸ்டனில் உள்ள ஒரு தொழிலதிபர் இறந்த நம்பிக்கையாளர்களின் ஆன்மாக்களுக்காக மன்றாடுவோரின் சங்கத்தில் சேர்ந்தார். அவர் உத்தரிக்கும் ஆன்மாக்களுக்காக செபிக்கவும், திருப்பலி ஒப்புக்கொடுக்கவும் ஆண்டுதோறும் ஒரு பெரிய தொகையை வழங்கினார்.

அவர் அவ்வளவு பெரிய ஒரு பணக்காரர் அல்ல என்பதை அனைவரும் அறிவர்.  ஒருநாள் சங்கத்தின் இயக்குநரான அருள்பணியாளர் அந்த தொழிலதிபரிடம். மிகப் பெரிய தொகையைத் தருகிறீர்களே, இது உங்களுடைய தனிப்பட்ட காணிக்கையா அல்லது பலரிடம் தானமாகப் பெறப்பட்ட தொகையா என மென்மையாய் வினவினார். 

அதற்கு அந்த தொழிலதிபர், “அன்புள்ள குருவே, நான் வழங்குவது எனது சொந்த பணமே. ஆச்சரியப்பட வேண்டாம், ஆமாம், நான் பெரிய பணக்காரன் அல்ல, ஆனால் நான் என்னால் செய்ய முடிந்ததைவிட அதிகமாக கொடுக்கிறேன் என்று நீங்கள் நினைக்கலாம். அது அவ்வாறு இல்லை. ஏனென்றால் எனது சேவைகள் மூலம் நான் பணத்தை இழக்காத வகையில், நான் கொடுப்பதை விட மிகுந்த அளவு என்னுடைய தொழிலில் நான் வருமானம் பெறுவதை உத்தரிக்கும் ஆன்மாக்கள் பார்த்துக் கொள்கிறார்கள். தாராள குணத்தில் அவர்களை யாராலும் வெல்ல முடியாது” என்று பதிலளித்தார்.

கல்லறைப் பாடம் - 29

கல்லறைப் பாடம் - 29

கொள்ளையர்களிடமிருந்து காப்பாற்றிய உத்தரிக்கும் ஆன்மாக்கள்

அருள்பணியாளர் லூயிஸ் மனாசி என்பவர் ஒரு தீவிர மறைப்பணியாளர். அவர் உத்தரிக்கும் நிலையில் உள்ள ஆன்மாக்களிடம் மிகுந்த பக்தி கொண்டிருந்தார். அவர் ஓர் ஆபத்தான பாதையில் தன் பயணத்தை மேற்கொள்ள வேண்டிய கட்டாயத்தில் இருந்தார். ஆகவே, அவர் அப்பயணத்தில் சந்திக்கக்கூடிய ஆபத்துகளிலிருந்து தன்னைப் பாதுகாக்க, உத்தரிக்கும் ஆன்மாக்களிடம் நம்பிக்கையுடன் மன்றாடினார். 

அவரது பாதை ஒரு பரந்த பாலைவனத்தின் வழியாக இருந்தது. அது கொள்ளைக்காரர்களால் நிறைந்திருந்ததெனவும் அவருக்குத் தெரியும். உத்தரிக்கும் ஆன்மாக்களுக்காக செபமாலைச் சொல்லியவாறு, அவர் மிக வேகமாக அப்பாதையைக் கடந்தார். அப்போது அவர் தன்னைச் சுற்றி பரிசுத்த ஆன்மாக்கள் அரண்போல சூழ்ந்து வருவதைக் கண்டு ஆச்சரியமடைந்தார். 

கொள்ளையர்கள் அவரைத் தாக்கமுற்பட்டபோது, பரிசுத்த ஆன்மாக்கள் அக்கொள்ளையர்களை எதிர்த்துப் போராடி அந்த குருவைக் காப்பாற்றினர். அவர் பாதுகாப்பாக அவ்விடத்தைக் கடக்கும் வரை அவருக்கு பரிசுத்த ஆன்மாக்கள் வழித்துணையாய் வந்தனர்.

கல்லறைப் பாடம் - 28

கல்லறைப் பாடம் - 28

புற்றுநோயிலிருந்து நலம்

ஜோனா தி மெனிசஸ் என்னும் பெண்மணி தனது குணம் பற்றி இவ்வாறு கூறுகிறார்: 

காலில் தனக்கு ஏற்பட்ட புற்றுநோயால் அவர் கடுமையாக பாதிக்கப்பட்டு சோகத்தில் ஆழ்ந்தார். அச்சமயத்தில் உத்தரிக்கும் நிலையிலுள்ள ஆன்மாக்களின் வல்லமையைப் பற்றி அவர் கேள்விப்பட்டதை நினைவில் வைத்துக் கொண்டு, அவர்கள் மீது தனது முழு நம்பிக்கையையும் வைக்க முடிவு செய்தார்.

மேலும் அவர்களுக்காக ஒன்பது திருப்பலிகளை ஒப்புக்கொடுத்தார். அதனால் அவர் குணமடைந்தால் பரிசுத்த ஆன்மாக்களுக்காக சாட்சியம் அளிப்பதாக உறுதியளித்தார். படிப்படியாக வீக்கம் குறைந்து, கட்டி மற்றும் புற்றுநோய் முற்றிலும் மறைந்தது. இவ்வாறு அவர் முழுமையான சுகம் அடைந்தார்.