கல்லறைப் பாடம் - 26
புனித பீட்டர் தமியானும் உத்தரிக்கும் ஆன்மாக்களும்
புனித பீட்டர் தமியான் பிறந்த சிறிது காலத்தில் தந்தை மற்றும் தாய் இருவரையும் இழந்தார். அவரது சகோதரர்களில் ஒருவர் அவரை வளர்த்து வந்தார். ஆனால் அவர் பீட்டரை மிகக் கடுமையுடன் நடத்தினார். அவரை கடுமையாக உழைக்க வற்புறுத்தினார். ஆனால் அவருக்கு மோசமான உணவு மற்றும் பழைய ஆடைகளையே வழங்கினார்.
வெளியில் ஒரு நாள் பீட்டர் மிக விலை உயர்ந்த ஒரு வெள்ளித் துண்டைக் கண்டெடுத்தார். உரிமையாளரைக் கண்டுபிடிக்க முடியாததால், ஒரு நண்பர் அவரிடம், எவ்வித மனஉறுத்தலுமின்றி அப்பொருளை அவர் தனக்காகப் பயன்படுத்திக் கொள்ளலாம் என்று கூறினார்.
பீட்டருக்கு நிறைய காரியங்கள் தேவைப்பட்டன. ஆகவே அவற்றுள் எதற்கு இப்பொருளைப் பயன்படுத்துவது என அவருக்குப் புரியவில்லை. ஆகவே மிகுந்த யோசனைக்குப் பிறகு, அவர் இப்பொருளை மிக உயர்ந்த ஒரு காரியத்திற்காக செலவிட வேண்டும் என முடிவெடுத்து, தம்முடைய பெற்றோரின் ஆன்மாக்களுக்காக ஒரு திருப்பலியை ஒப்புக்கொடுத்தார். அது முதல் அவருடைய வாழ்வில் மிகப்பெரிய மாற்றம் ஏற்பட்டது. உத்தரிக்கும் ஆன்மாக்கள் அவருக்கு தாராளமாய் கைம்மாறு வழங்கினர்.
ஒருமுறை அவரது குடும்பத்தின் மூத்த சகோதரர் பீட்டர் வசித்துவந்த சகோதரரின் வீட்டிற்கு வந்தார். அப்போது அவர் அனுபவித்த கொடூரமான துன்பங்களைக் கண்டு அதிர்ச்சியடைந்தார். ஆகவே, அவரை தனது சொந்த பராமரிப்பில் ஏற்றுக்கொண்டார். நல்ல ஆடை அணிவித்து, தனது சொந்தக் குழந்தையாக அவருக்கு உணவளித்துப் பராமரித்தார். மேலும் அவரை மிகவும் அன்பாகப் படிக்க வைத்தார். அதன் பிறகும் பீட்டரின் வாழ்வில் ஆசீர்வாதத்திற்கு மேல் ஆசீர்வாதம் தொடர்ந்து வந்தது.
விரைவில் அவர் அருள்பணியாளராகத் திருநிலைப்படுத்தார். பின்பு ஆயராகவும், கர்தினாலாகவும் உயர்ந்தார். அவரது இறப்பிற்குப் பின்பு இவருடைய பரிந்துரையால் நடைபெற்ற பல அற்புதங்கள் அவரது புனிதத்தன்மைக்குச் சான்றளித்தன. இதனால் அவர் புனிதர் நிலைக்கு உயர்த்தப்பட்டார்.
உத்தரிக்கும் ஆன்மாக்களுக்காக திருப்பலி ஒப்புக்கொடுத்ததன் பயனாக ஓர் ஏழைச் சிறுவன் எவ்வாறு பல்வேறு ஆசீர்வாதங்களைப் பெற்றான் என்பதை புனித பீட்டர் தமியானின் வாழ்விலிருந்து நாம் அறியலாம்.
